新聞類別
財經
詳情#
【明報專訊】有「蘭桂坊之父」之稱嘅盛智文幾年前做埋海洋公園主席之後，成日扮鬼扮馬，最新搞作係喺海洋公園新園區開幕時，「露兩點」搏盡扮紅番，十足個行為藝術家咁，佢做埋西九文化區管理局表演藝術委員會主席都理所當然啦。原來佢自己都係收藏家，仲自爆佢嘅藝術啟蒙者係Steve Wynn，冇錯，就係曾經錯手篤穿咗畢加索名畫嘅永利澳門（1128）老闆！
盛智文接受西九最新嘅每月通訊訪問，讚Wynn係世界上一位擁有最多畢加索、莫奈和林布蘭等大師作品嘅收藏家之一，全部都係聞名於世，價值不菲的珍品，又話有幸成日同佢見面。
點解？因為盛智文係永利嘅非執董嘛。2006年Wynn將佢幅畢加索嘅《夢》賣出去，成交前畀朋友睇嘅時候唔小心整爛咗塊畫布，雖然修復得返，但幅畫即刻減值四成，只值8500萬美金。
間屋七層高 每層有珍藏
盛智文提到18歲時在滿地可看巴伐洛堤唱歌劇，帶領佢進入藝術世界，15年前ART ASIA首次來港的時候開始收藏藝術品，到家，佢有唔少美國當代藝術家Jim Dine的作品，包括兩件《Hearts》，又有專畫肥人嘅哥倫比亞Fernando Botero嘅兩件雕塑。
佢又連「香港民主女神」余若薇的書法都有，仲大讚余若薇寫得一手好字
回應 (0)
