宏霸缺水 一年內第六度配股

【明報專訊】近排因為官司纏身頻傳莫財的「老公豬」陳振聰，持有約一成三股權嘅宏霸數碼（0802）似乎同樣非常「缺水」，今年頻頻配股，噚日再公布成功配股集資8220萬，小琴屈指一算，原來已經係宏霸近12個月第六次抽水，平均兩個月一次，好過出糧。

話說宏霸噚日又再公布配股，向13名投資以每股1蚊發行咗8220萬股，相當於擴大後股本16.7%，小琴幫宏霸計一計數，由舊年7月第一次配股起，今次已經係一年嚟第六次配股，總共集資咗3.16億，其中踏入2011年後更加係愈配愈密，六個月內配咗4次。

睇返歷史，喺2009年2月用介紹形式嚟香港上市嘅宏霸，打住已故「小甜甜」龔如心同陳振聰招牌，上市初期都可以話係曾經風光一時，股價最高曾經升到接近16蚊，不過宏霸股價同陳振聰嘅命運同步下滑，上年7月配股價仲有5蚊，到咗噚日已經得返1蚊，真係唔知係咪風水作怪啦。