「季季紅」名字唔老黎

【明報專訊】恒指踏入7月份即重現升勢，新股亦都排住隊上市，其中一隻係挾着米芝蓮推介食府之名，主要喺新界經營中式酒樓嘅喜尚控股（8179），將會喺7月8日創業板上市，最高集資額8000萬元，喜尚旗下一間喺屯門藍地嘅「季季紅風味酒家」，就係2011年米芝蓮推介食肆之一，好威水。不過，小琴就好擔心股民有啲迷信，「季季紅」個名唔係好利市（季季見紅）。

喜尚控股噚日舉行上市記者會，宣布將會集資最多8000萬元，其中約七成會用作開設新酒樓、增加服務及產品種類；餘下一成會作一般營運資金。

旗下5間酒樓位於新界

喜尚控股打算在元朗新開嘅「紅爵御宴」可筵開120席，容納多達1500人，主席黃君武昨日就好自豪咁宣稱﹕「（紅爵御宴）將是新界最大中式酒樓，樓底高17呎」。

喜尚控股旗下有5間酒樓，全部都叫「季季紅」，喺財經界就唔多「老黎」，不過，「季季紅」嘅菜式就獲米芝蓮青睞，旗艦店藍地分店去年榮獲「米芝蓮車胎人美食」餐廳。

報料電郵﹕[email protected]