銀娛5天工作激勵員工

【明報專訊】澳門上個月博彩收入繼續升到「嘭嘭聲」，有人估同銀河娛樂（0027）位於路氹嘅新場效應有關，銀娛未有耐公布業績，小琴證實唔到佢個新場係咪谷大咗濠江個餅，但就肯定有另類「新場效應」，就係澳門銀河綜合渡假城開幕之後，銀娛嘅員工轉享5天工作制！

其實5天工作已經係大勢所趨，不過好多華資公司喺呢方面都重係猶豫不決，銀娛靚女IR噚日同小琴茶敍，講開之前為個大project開幕，都捱咗好幾個月，好消息係個渡假城5月中開張後，公司終於落實醞釀咗好耐嘅5天工作制，唔怪得小琴發現佢又靚咗，成個人容光煥發咁啦！

新場成績好 以示慰勞

小琴個人揣測，係銀娛老闆大小呂生（即係呂志和同佢長子呂耀東）見個project搞得好好睇睇，所以慰勞吓啲員工。靚女IR就話，依家每日工作時間長半個鐘，但周六日「休孖day」，平日做嘢仲爽手咗添！各位未行5天工作制嘅老闆，真係應該好好咁考慮吓效法銀娛喇。