羅蘭代言宏利 賣花讚花香

【明報專訊】宏利噚日搞咗個公積金75周年誌慶，慶祝喺香港管理公積金75年，仲搵嚟影壇長青樹羅蘭做推廣大使，原來羅蘭和宏利公積金一樣大，今年都係75歲，唔怪得宏利搵佢做推廣大使啦。

宏利公積金75周年 恰與羅蘭同齡

宏利話，為咗加強宣揚市民須及早為退休生活作好準備，於是邀請羅蘭做推廣大使，參與宏利嘅慶祝活動，向市民推廣及早為退休籌劃嘅重要性。

貴為影后嘅羅蘭，噚日出席誌慶活動時就話，喺2000年強積金出台嘅時候，佢已經65歲，無得享用強積金計劃，所以覺得家打工仔好幸福，有僱主幫手供款，為退休作保障。

佢又話，喺年輕嘅時候已經開始儲錢，但就覺得投資要搵專業人士幫手，然後就開始賣花讚花香，指宏利有75年管理公積金嘅經驗，搵佢哋幫忙就放心得多，果然係稱職嘅推廣大使。