俄鋁出錢出力 推廣香港上市

【明報專訊】海外企業來港上市個案日漸增加，除咗港交所過去幾年四圍推介，小琴發現首間來港掛牌的俄羅斯企業俄鋁（0486）喺背後亦做咗唔少工夫。俄鋁早前唔單止透過出書、拍片及贊助本地大學論壇，向本港推廣俄羅斯文化，其上任3個月的香港辦事處主管李崇正，噚日又「變身」港交所推廣大使，現身說法向俄羅斯企業及投資界分享喺香港上市嘅成功經驗。

事緣財經雜誌《FinanceAsia》噚日喺香港舉辦「俄羅斯融資及投資峰會」，李崇正作為演講嘉賓，以俄鋁為例，提到在港上市的俄鋁及中鋁（2600），較同業美鋁可享大幅溢價，另外喺中國擁有大量業務嘅外企，亦可藉喺港掛牌鞏固品牌及市場。不過佢認為作為國際金融中心嘅香港目前只有18家海外上市企業，反觀新加坡同倫敦分別有43及600多間外國上市公司，可見本港遠未發揮海外企業融資平台嘅角色。