近半港人 唔改信用卡密碼

【明報專訊】Visa噚日舉行「精明安全用卡」活動，教育持卡人安全地使用Visa卡，Visa透露，香港嘅盜用交易情况比較少有，每100美元交易金額，只有2美仙係盜用交易，比起全球數字為低。不過，由於盜用情况少，香港持卡人保安意識就麻麻哋，所以先至要搞呢個推廣活動，叫港人留意安全用卡嘅方法。

Visa調查發現，原來有45％香港持卡人，從來或者極少更改密碼，又會有兩成人將密碼記喺筆記簿、手機同埋電腦入面，都係好唔安全嘅行為。因為咁樣，Visa會喺噚日起到下個月，派出一架流動展覽車，穿梭港九去宣傳「精明安全用卡」嘅消息。

港人少遇到盜用 反而鬆懈

另外，香港喺最少遇到信用卡盜用交易嘅排行榜上排第2，不感受到支付卡盜用交易威脅地區組別內都排第2。不過，Visa國際風險分析及方案主管Kevin Lau就話，因為港人好少遇到盜用情况，所以好依賴Visa卡嘅安全性，反而忽略晒基本安全用卡嘅方法。

Visa嘅資料指出，家全球信用卡盜用交易量處於歷史低水平，每100美元，香港被盜用金額係2美仙，全球整體金額係5美仙。