馬凱博出力撐iBond

【明報專訊】「買好？唔買好？」近日全城熱話買唔買嘅，一定係政府推出嘅通脹掛鈎債券（iBond）。小琴就覺得市場反應一般，有啲券商、經濟師直頭話回報太低唔值得買。作為聯席牽頭行之一嘅匯豐，香港區總裁馬凱博（Mark）則力撐iBond係好嘅產品，可以幫助市民對抗通脹，而佢又會否身體力行幫襯呢？小琴聽講佢都會打算買番啲支持下喎。

小琴噚日見到阿Mark，當然關心佢會唔會買iBond啦。不過佢就大賣關子，話自己從來唔會講人知佢投資啲乜喎，佢買唔買iBond，突然間變咗個不能說的秘密。但小琴心諗，阿Mark就算想買都未必得，因為佢係匯豐派嚟駐香港，可能未必合乎買iBond嘅基本資格，就係持有香港身分證。後尾聽講，原來阿Mark並唔係「無證居民」，一路有身分證在手，聽講佢仲打算入表申請。iBond每手1萬蚊，唔知佢會認購幾多呢？