怡和黎定基 彈港醫療服務唔開放

【明報專訊】講到香港嘅貿易市場，相信好少有人話唔自由。不過，喺香港打拼咗幾十年嘅怡和洋行董事黎定基（Anthony J.L. Nightingale）噚日喺總商會嘅討論會上就出聲話，香港醫療服務仲未開放，令到市場自由度唔「純正」喎。佢擔心，「香港經濟有98%係靠服務業支撐，但同製造業比，就好難會將貿易自由同服務業聯繫埋一齊」。

又加上近排日本積極探討加入泛太平洋戰略經濟伙伴關係協定（TPP），黎定基心急大呼，「當其他人都在玩自由貿易協定，香港自然應該入TPP啦」，否則點同TPP四個奠基國新加坡、新西蘭、智利同文萊競爭呢？

但係有與會嘉賓就覺得，「香港已經太過開放，黎定基嘅想法係典型老外觀點。」講到香港點樣可以喺全球貿易市場上大展拳腳，黎定基就話不單佢自己，大家都應睇到香港興建第三條機場跑道嘅緊逼性，不然對於香港嘅物流業將成為一大挑戰。