沽神港聘中國專家

【明報專訊】喺金融海嘯靠沽空股票成名嘅「沽神」保爾森（John Paulson），早排就因為衰喺一隻加拿大上市嘅中國民企嘉漢林業（Sino Forest）手上而英名受損，唔知呢位著名對冲基金經理係咪已經怕怕，前日就話決定喺香港請番個「中國專家」，代佢研究啲中國民企咁話喎。

近排民企風暴鬧到滿城風雨，就連鼎鼎大名嘅沽神都中招，由「沽神」管理、轄下資產達370億美元嘅對冲基金Paulson & Co，旗下最大嘅一隻基金6月份表現下挫超過一成，其中嘉漢林業更加係「功不可沒」，單係呢隻股票已經蝕咗沽神5億美金（約39億港元），相當於6月份跌幅嘅2.5個百分點。

嘉漢上個月初被渾水研究（Muddy Waters）嘅Carson Block發表研究報告，指公司誇大林業資產，股價兩日勁跌七成，搞到沽神狼狽沽貨「止蝕」，輸錢都算，最慘仲係，靠喺金融海嘯前沽空次按證券成名嘅沽神，今次竟然畀「後輩」Carson Block沽空番佢揸嘅股票，面都冇埋，認真係老貓燒鬚。

會繼續買中國股票

搞成咁，沽神少不免都要出嚟解解話，小琴聽老友講，沽神前日就同投資者開咗個電話會議，話除咗嘉漢之外，其他損失主要同啲難以預測嘅宏觀經濟事件有關，好似歐債危機同美債上限談判等等。

不過沽神話佢仲會繼續買中國股票，但就打算請番個中國專家幫佢睇實啲公司有冇問題，人選仲會喺香港搵，咦，小琴醒起渾水都係香港註冊公司，莫非佢想搵Carson Block？！

報料電郵﹕[email protected]