渾水踢爆A貨渾水

【明報專訊】渾水研究（Muddy Waters）嘅大名，最近令上市公司聞風喪膽。有香港人竟然諗到借佢過橋「搵水」。渾水研究話事人Carson Block日前入稟洛杉磯法院，踢爆有一個香港人借渾水之名，向一間公司勒索200萬美元。呢個神秘人自稱來自渾水，恐嚇公司如不乖乖就範交錢，就會由渾水寫報告寫衰佢。渾水澄清話，此人根本同渾水無關，純粹係借用其名招搖撞騙。

不過，渾水暫時未有踢爆呢個騙徒嘅名，所以都冇人知係邊位仁兄斗膽冒充，亦唔知佢勒索邊間公司。小琴奉勸各位公司高層，下次有人自稱渾水嘅人來電，唔使驚到要急急沽貨，皆因佢大有可能只係A貨。

除咗畀人冒認之外，渾水研究指美國新聞網站BriefingWire.com錯誤發布信息。網站喺6月21日發布一篇新聞稿，內容話美國證交會將會檢控渾水同Carson Block欺詐，更指Block涉嫌造市。但美國證交會較早前已確認新聞稿係假冒，但就唔肯回應有冇開檔案調查渾水。渾水早排踼爆好幾家內地民企，令到投資者損手爛腳，有好多人質疑佢手法有冇問題，一紅自然多是非，何况專玩踢爆，睇怕渾水以後仍會係新聞主角。