郭炳聯勸小學生要「每事問」

【明報專訊】每年書展都有一本新地（0016）贊助嘅免費刊物《讀書好》派發，介紹當屆好書，新地副主席郭炳聯噚日仲親自同小學生分享讀書心得。佢同學生推介，何文匯教授嘅著作《箴言精選》，郭炳聯話，其中一篇談到好奇心相當重要，學習時遇到唔明白嘅地方，要「每事問」。他又勸勉小學生年輕嘅時候，要努力讀書，唔好浪費時間。

郭炳聯又講到，清朝一代名臣曾國藩嘅家書，對佢影響亦相當之大，令他感受到勤力、節檢、謙虛嘅重要，亦與其父郭得勝老先生嘅教導不謀而合。

有小學生就問「聯少」平日咁忙，要管理旗下公司業務，如何抽時間睇書呢？郭炳聯笑指，如果夜晚瞓唔着或者放假，可以抽時間睇吓書。「到了50幾歲年紀，修身比其他各方面更重要。遇到好書就要同朋友分享。要趁年輕時候努力，到40、50歲就會覺得好得益。」唔知小學生聽完郭先生一席話，又有冇得益呢？