港交所也被渾水

【明報專訊】自從網上研究機構Muddy Waters Research（渾水研究）上個月一炮而紅後，香港可謂興起一股渾水風潮，而最新嘅受害者竟然係港交所（0388）！不過港交所嘅股東請放心，港交所並非被渾水研究「唱衰」，而係有啲不法分子冒認港交所職員，約香港上市公司CEO傾偈，即係畀人渾水摸魚。

港交所噚日發表通告提醒上市公司，話得悉近日有冒充上市科職員嘅人士，曾經接觸一啲上市公司，要求同上市公司高層包括行政總裁交談。通告又話港交所一向有特定職員負責監察兼聯絡各大小上市公司，而主要溝通渠道一般係上市公司嘅授權代表或者公司秘書，呼籲上市公司如果有任何人士，以港交所上市科職員身分同佢哋接觸，宜審慎處理喎。

港交所發言人唔肯話畀小琴知邊間公司「中招」，呢啲渾水兼運桔之徒亦居心叵測，不過小琴可以肯定嘅就係港交所樹大招風，皆因佢哋上個禮拜先發現，有人喺內地用港交所個名招搖撞騙，今個禮拜又有新花臣，反映港交所幾咁有「江湖地位」，先至會成不法分子斂財嘅工具。