五主權基金 中投年報最遲出

【明報專訊】主權財富基金代表國家或地區政府進行投資，舉手投足都對市場影響力好大，中國投資公司（CIC）呢一類龐然大物就更加唔使講。為咗順應國際潮流，中投自成立第二年（2008年）起發布年度報告，以增加透明度。

不過小琴發覺，中投出年報的速度就慢咗小小，2010年（12月結）嘅年報要到噚日先至有得睇，之前2008及2009年嘅年報亦都要等到翌年下半年先有，較年結日相距近7個月。

慢新加坡3個月

觀乎全球有出年報嘅幾家主權基金（見表），新加坡淡馬錫及政府投資公司（GIC）今年3月底先至年結，但淡馬錫7月初已出到年報，政府投資公司嘅年報都係與中投同時於昨日發布，可見中投的動作慢過新加坡同行成3個月！

同樣喺12月做年結嘅香港金管局外匯基金，同埋挪威全球退休基金，都早已喺4月份出左2010年報告，亦較中投早咗3個幾月。

去年回報11.7% 贏其他主權基金

然而中投都唔係披露得最慢嘅一家主權基金。小琴進一步比較，終於搵到12月年結嘅阿布扎比投資局，原來至今尚未出到2010年年報。但得意嘅係，阿布扎比投資局去年3月中就出咗2009年嘅報告，證明中東人做嘢又唔係真係咁慢。

好彩中投嘅投資決策唔似佢年報咁慢。剛出爐嘅報告顯示，呢間幫國家外匯儲備尋找出路嘅機構，舊年用咗357億美元投資，年度化回報率有11.7%，高過上述其他主權基金。大舉入市亦令到中投手持現金急降，佔整個組合嘅比例由2009年嘅32%降至4%。

報料電郵﹕[email protected]