郭家增持新地

【明報專訊】最近新地（0016）大股東郭家密密增持股份，不過「被分家」嘅大哥郭炳湘嗰邊就一直無動靜。最近佢就打破沉默，透過發言人回覆我哋話﹕「新增持呢啲股份，我家人都有份。」

由上個月底一路到今個月15號，郭氏基金前後足足增持咗13次，買咗1100萬股，埋單計數都差唔多用咗13億銀，郭老太、二哥阿江同三弟阿聯喺聯交所股權披露顯示嘅持股量一直跟住上去，但大佬嗰邊就一直冇郁過。小琴早幾日就想問吓大郭生最近有冇跟埋一齊增持，佢透過發言人答小琴﹕「據郭生了解，『郭炳湘家人』都係受益人……最近新地嘅增持，『郭炳湘家人』都有份。」

小琴再問郭炳湘係唔係認為佢本人都有份，佢自己有冇增持，發言人又冇正面回應。

唔回應自己有冇增持

2008年郭炳湘喺家族紛爭之後冇得做主席，一直只係新地嘅非執董。到舊年10月，新地宣布郭氏家族基金重組，郭家話郭炳湘已經唔係受益人，但郭炳湘就堅持，個基金佢仲有份。新地最新一份中期報告裏面寫住，郭炳湘仍然報稱擁有郭氏家族基金嘅權益，不過就註明呢個權益有爭議。

大佬無參與新地日常管理之後，仍然相當活躍投資中港地產，除咗同海峽兩岸好幾個大孖沙合組財團投資地產之外，更同新地嘅「宿敵」長實（0001）合作發展何文田亞皆老街「地王」項目