玖紙張茵 名勝松山湖建豪宅

【明報專訊】比起內地其他一線城市，東莞既整體樓價唔算好高，但係當地有個好出名嘅風景名勝松山湖，被譽為東莞新八景之首，結果喺松山湖邊上就出現愈來愈多豪華別墅，搞到畀民眾質問靚景係咪只為富人而設，而最近，玖龍紙業（2689）女老總張茵就畀人發現響湖邊圈地起屋。

據內地行家講，原來張茵好早以前就買咗松山湖邊嘅地，後來將部分地塊轉手賣畀萬科，由萬科建成「松山湖1號」別墅區。呢塊地位於松山湖核心景區內，離湖邊不到20米，位置一流，而張茵亦都唔笨，預留咗最好嘅100畝地冇賣給萬科，睇嚟佢係打算留來畀自己閒時賞湖之用。

講到「松山湖1號」，今年6月底辦好晒工程許可證，全區共40楝別墅，單位面積從600幾平方米到4000幾平方米不等，初步預計平均售價每平方米2萬蚊，貴過東莞市區樓幾千蚊。

中國富豪華南緊聚居所

但原來除了「松山湖1號」，湖畔沿岸仲有錦繡山河、虹溪諾雅等等豪宅項目。連同萬科在內，喺當地開發既地產商有意將松山湖打造成「南中國富豪第一居所」，部分景觀好嘅別墅豪宅甚至試過叫價每平方米7萬蚊。

之不過，當年東莞市花鉅資改善松山湖環境，仲將其打造成「東莞新八景」之一嘅旅遊景點，原本應該係畀普羅大眾公用嘅地方，嗰度個環湖單車徑好出名，小琴最近都慕名上去踏單車，喺風光如畫又平坦嘅路上，踏吓單車，賞吓路邊嬌花，不知幾咁寫意，喺香港真係搵唔到咁靚嘅地方。依家湖邊豪宅愈起愈多，變成富豪既「家中後花園」，難怪當地唔少市民都有微言喇。

報料電郵﹕[email protected]