標準人壽CEO 搭的士去灣仔

【明報專訊】香港作為國際金融中心，好多外國公司都在港設立辦事處，而派駐嘅主管好多都係外國人，佢哋有時會入鄉隨俗，學番兩句廣東話傍吓身。小琴覺得佢哋叫「燒賣」及「蝦餃」發音最正，可能平時經常去飲茶學到。

公司名就無講錯

講起外國人學廣東話，有時都搞出唔少笑話，好似標準人壽行政總裁（香港）羅伊，來香港4年，最多笑話係坐的士。佢話，試過約咗朋友喺灣仔食飯，佢預計車程應該只需20分鐘，點知坐咗40分鐘都未到，落車時發現唔對路，周圍都係工廠大廈，唔似灣仔，於是問的士大佬係唔係灣仔？司機話你剛才係講柴灣！原來佢上車時講中文地方名，只記得「灣」字，差一個字就差之毫釐謬之千里，結果錢及時間也花多咗。

不過，佢講公司名稱「標準人壽」嘅發音就正確，小琴問佢為何不學普通話，佢話在香港要學廣東話，他日如果要調去內地才學「煲冬瓜」喎。