7大證券經紀團體 計劃去信政府反黑池

【明報專訊】獅子銀行噚日派成績表，條街嘅反應唔錯，但係佢近排另一個動作就惹來強烈反彈，就係佢哋個StockMax（即類似黑池）服務，令本港7大證券經紀團體十分憂慮，會損害小投資者嘅利益，準備聯署發信畀政府反映意見！

簡單嚟講，StockMax呢個平台，係將散戶拖落水── 呀，應該話係拖落「黑池」度，畀散戶啲盤同大戶啲盤配對。原本所有獅子行嘅散戶會自動參與，早排被批評話做法擾民，令獅子行讓步，話可能淨係畀一啲合資格嘅散戶參與。

協會主席：監管有好大風險

不過，證券業協會主席李耀榮就話，邊個合唔合資格實在係口同鼻拗，而且一旦獅子行搞完，其他銀行跟風，整到市場上多幾個黑池，咁港交所（0388）呢個交易平台嘅價格發現功能亦會大打折扣。佢又舉舊年花旗國「閃崩」單嘢（即去年5月因為高頻交易突然崩盤，致美股大跌）做例子，話黑池喺監管方面存在好大風險，一旦有問題發生好難查。

7大證券經紀團體噚日開會傾呢件事，有份開會嘅恒豐證券董事總經理張華峰就話，大家都好擔心有大行帶頭向散戶開放黑池，損害小投資者嘅利益，所以今次大家有好大決心，會盡快聯署發信向政府反映憂慮。至於地位有機會受黑池挑戰嘅港交所，同埋發牌畀獅子行搞StockMax嘅證監會，都表示無話可說喎。