梁高戴珍珠頸鏈 喻「句句真言」

【明報專訊】一向愛著套裝嘅恒生（0011）女大班梁高美懿，噚日以一襲紫紅色套裝配上珍珠頸鏈，出席恒生業績後記者會，戴住珍珠鏈嘅佢，仲識玩食字講自己「句句真（ 珍）言」，梁太又提到，一出嚟打工已經感受到樓價高企嘅壓力，十年如一日，佢家同樣感受到股強勁壓力呢！

哈哈，不過梁太今時唔同往日，一般打工仔當然頂唔住樓價以幾何級式上漲，但梁太貴為恒生大班，年薪以百萬計，普通樓盤當然難唔倒佢，睇佢噚日戴住一粒大過波子嘅珍珠鏈，就知梁太就算面對好大壓力，起碼都會好似一般女士咁，扮靚減壓。記得佢周一出席業績會，藍寶石頸鏈襯藍色套裝，聽講畀囡囡批評著到一身藍，好似唔多好，因為英文話人blue，即心情唔多好咁解，業績合乎市場預期，梁太心情又會差得去邊呢？

梁太又透露，舊波士、匯控（0005）前主席浦偉士11月將會返嚟香港見吓一班匯控老友，梁太相當興奮期待。小琴最好奇家匯控行政總裁「九哥」歐智華矢言要帶5號仔重返浦偉士當日帶領嘅風光時代，聽講歐智華家仲不時同浦偉士聯絡，匯控上半年業績好過市場預期，唔知浦又點睇「九哥」表現呢？