平保報告：中國人財商 僅僅合格

【明報專訊】「智商」（IQ）、「情商」（EQ）呢兩個名詞耳熟能詳，但「財商」究竟係量度啲乜嘢？同埋具體點樣量度？可能大家同小琴一樣都唔係太清楚，平保（2318）噚日就發表咗內地首份有關中國人財商指數嘅報告，結果發現，中國人財商只係僅僅合格，平均得分60.1分，男性嘅財商高於女性，財商狀况呈兩低一高，即係高態度、缺知識和低行動的特點。

財商呢一個名詞，最早喺全球暢銷書《富爸爸窮爸爸》中出現，同IQ和EQ並稱為現代公民三大素質能力，主要係指一個人對財富的認知、獲取及運用嘅能力。

平保呢項調查，係同新浪財經花咗5個月去完成，喺全國14個城市展開，以普通城市居民、高收入群體和大學生群體為主要研究對象，有效樣本達4112個。一個人的財商得分係由知識、態度、行為以及財富性格得分加權而成，如何獲取、管理、應用財富就係影響財商得分嘅最重要因素。