地方政府缺水 賣股套現

【明報專訊】今年地方政府可以話為錢頭痛，中央講到明保障房一定要起，再加上各類惠及社會民生政策，令地方政府開支大增；偏偏今年打壓樓市力度又重，地方冇咗賣地呢樣最主要嘅收入來源，好衰唔衰銀行又唔夠錢借，仲要面對一大堆就到期嘅地方債，缺水之下，地方政府唯有採取最後手段，就係賣股套現。

為起保障房 要錢唔要股

內地媒體就同呢班股東計計數，今年以來被地方政府及地方國資委減持嘅上市公司有25間，其中10間被減持金額超過1億。埋單計數，前前後後一眾地方政府減持嘅股份達到1.76億股，套現金額33.1億，而湖北省黃石國資委、湖南國資委同武漢國資委就係減持最多嘅地方國資委。

值得一提係，地方政府大手賣出股份，九成以上係折讓價成交，部分折讓價更超過5%，從中都可以睇得出地方政府急於套現嘅心情。

咁又好難怪佢哋，事關未來兩年要開始還錢嘅地方債務比較多，債務危機亦令地方政府唔敢立亂再發行新債，響冇咩辦法增加收入之下，想唔賣股票撲水都唔得啦。

報料電郵﹕[email protected]