包玉剛伯侄似餅印

【明報專訊】已故「船王」包玉剛在世時喺政商界德高望重，但自從他於1991年逝世後，包氏家族嘅影響力已逐漸減弱，其後人近20年來喺公開場合露面嘅次數亦不多（女婿吳光正例外）。

不過，小琴噚日喺「港台經貿論壇」採訪時就遇到包玉剛個侄包靜國，唔使換卡片，小琴一眼就估到佢係「船王」嘅後人，因為佢個樣同「船王」似到十足十。望住佢不禁令人諗返起「船王」當年的英姿。

包靜國為包玉剛胞弟包玉星嘅仔，而家係九倉中國嘅執行董事，噚日佢出席個論壇同小琴一樣，都係做聽眾，並無特別。不過小琴喺出邊採訪咁多年，就係第一次喺公開場合見佢，可見佢平時為人十分低調。講開又講，全城關注「賭王」何鴻燊家人及「小甜甜」龔如心家人與陳振聰嘅爭產，其實包家早前亦為咗遺產而對簿公堂，主要涉及包玉星遺產管理人匯豐信託，向包靜國兄長包綸國追討包玉星的遺產。