新聞類別
財經
詳情#
【明報專訊】相信唔少小股東都等緊中移動（0941）推出iPhone等到頸都長埋，點解咁耐都未有消息，可能同背後嘅政治角力有關。噚日有消息指中國移動向主管部門國資委投訴，話聯通（0762）從中作梗，阻止中移動推出iPhone。
新浪科技噚日引述兩間電訊商工作會議嘅消息，原來聯通同中移動為咗iPhone互打小報告，聯通早先向國資委匯報話，中國移動既然未同蘋果簽訂合作計劃，就唔應該故意引誘聯通iPhone用戶離網他投。中移動當然唔服氣，於是又向國資委打小報告，話聯通從中作梗，想阻撓中移動推出iPhone咁話。
中移積極搶iPhone客
中移動推出iPhone一直傳得沸騰，外界甚至估計最快9月有好消息。其實自從舊年聯通引入iPhone 4以來，中移動唔係剩係得個等字，旗下唔同分公司都為iPhone 4度身訂做各種服務，好似北京移動專程為iPhone4用戶剪卡同換卡，等客戶可以用移動SIM卡放入iPhone用到2.5G服務上網，仲喺官方網站設立iPhone 4服務專區，積極拉攏iPhone客。據新浪科技講，北京移動現時嘅iPhone用戶數目有60萬，比北京聯通嘅34萬iPhone用戶高得多，中移動無同蘋果簽約都有咁好嘅成績，唔怪得會有聯通從中作梗嘅傳聞。
報料電郵﹕[email protected]
留言 (0)
