騰訊安居計劃 助員工置業

【明報專訊】四大門戶網站人才爭奪戰日益白熱化，小琴聽聞網界一哥騰訊（0700）考慮到員工囊中羞澀，卻又盼有瓦蓋頭，先前推出了「安居計劃」，提供20到30萬元人民幣的6年期免息貸款，作為一種「福利」。騰訊員工甚至有機會去公司慈善扶助嘅縣鎮，掛職當「縣官」。

睇過《蝸居》嘅觀眾想必都知道，內地如今買套似樣嘅居所都唔容易，照騰訊6月底推出嘅「安居計劃」，只要喺公司工作滿3年，且購買首套房嘅基層員工，都可申請到一筆額度20萬至30萬元人民幣嘅6年期免息貸款。呢筆免息貸款嘅總額將達10億元，目前第一批申請者已經攞到貸款。

至於當縣官究竟又係咩一回事？原來騰訊公益慈善基金會喺一啲省市推動「新鄉村行動」，資助當地嘅教育、文化發展。喺項目進行過程中，騰訊會派出公司員工，到項目所在地掛職，負責項目協調。派去嘅員工通常充任縣級機關嘅副職，有啲甚至有機會當上副縣長，至於算唔算係「福利」？咁就睇你點諗啦。