新聞類別
財經
詳情#
【明報專訊】港鐵（0066）除咗行政總裁周松崗即將退休之外，再有兩個重量級人物亦都夠鐘讓位，喺新一哥韋達誠（Jay Walder）嘅「港鐵新時代」來臨之前，提前結束一個「地鐵舊時代」。
港鐵噚日宣布，物業總監何恆光，同埋法律總監及公司秘書杜禮（Leonard Bryan Turk）分別會喺今年10月同9月退休。佢哋兩位都係由地鐵過渡到港鐵嘅老臣子。負責發展鐵路上蓋物業嘅何恆光1991年開始為地鐵服務，主理多個港鐵區域發展項目，仲領導港鐵喺內地嘅物業管理同發展。小琴記得早年見過何總，佢講過參與起維港一對「門神」，IFC（國金中心）同ICC（環球貿易廣場）令佢對住兒孫也可以引以為傲。
物業總監公司秘書讓位
至於杜禮嘅「鐵齡」更長達30年，當然有主理當年地鐵上市，同埋相信係更棘手嘅兩鐵合併。
前稱地鐵嘅港鐵（0066）2000年上市，初時增長良好，不過後來大家發現港鐵的新鐵路線，好似機鐵同東涌線好睇唔好賺，股價就比較牛皮。公司之後發展係點，就要睇下管理紐約地鐵嘅韋達誠能唔能夠將佢大翻身喇。
何恆光同杜禮兩個位會由佢哋嘅副手接任，即係現任副法律總監馬琳（Gillian Elizabeth Meller），同副物業總監鄧智輝。另外，市務及車站商務總經理楊美珍9月將任商務總監。
報料電郵﹕[email protected]
留言 (0)
