數碼通出app 擋推銷電話

【明報專訊】相信各位讀者間唔中都會畀傳銷電話打擾，宣傳借錢纖體服務，數碼通（0315）噚日就推出名為「電話管家」嘅新服務，幫客戶阻擋傳銷電話。數碼通執行董事陳啟龍講，呢項服務比坊間免費嘅「垃圾電話」Apps更加優勝，事關滋擾電話庫儲存係數碼通系統，由系統幫你截斷來電，確保用戶毋須受到騷擾，各位數碼通用戶如有興趣，可以到App Store或Android Market下載，服務盛惠15元月費。

系統截斷滋擾電話

陳啟龍講，據公司推算，估計香港人每日收到超過200萬個滋擾電話。呢項服務好處係用戶可向數碼通投訴滋擾電話，集合群眾力量設立滋擾電話庫，由數碼通負責最終篩選。用家亦可以自己設定「黑名單」，又或者開啟「白名單」設定，相當於設定必聽號碼，適合外遊人士選用。不過，陳啟龍亦好坦白，話為免「殺錯良民」，數碼通滋擾電話庫宜鬆不宜嚴，好似銀行打畀旗下客戶，宣傳服務，就未必算係滋擾電話，加上傳銷公司亦都不斷換新號碼，所以即使有呢項服務，都可能仲有漏網之魚。