新聞類別
財經
詳情#
【明報專訊】福布斯2010年嘅中國上市公司CEO薪酬榜中，聯想（0992）總裁楊元慶以7872萬元年薪排首位，成為內地去年嘅「打工皇帝」。但小琴仔細一諗，呢個稱呼用喺楊元慶身上似乎唔妥，因為佢6月起已係公司第二大股東。為自己公司工作，何來打工之說？
講番楊元慶早前斥31.5億買入聯想近8億股呢單嘢，小琴一直疑惑咁大筆錢由邊度嚟。噚日聯想業績電話會議上，公司主席柳傳志終於揭開謎團，原來楊元慶係借錢買股份，但有人追問楊元慶借咗幾多，同埋具體嘅借貸安排，同場嘅楊元慶就唔肯透露，淨係表示借錢買公司股份，顯示佢對公司前景充滿信心。
指對公司有信心 柳傳志盛讚
提及楊元慶嘅投資，柳傳志尋日都盛讚佢嘅行為，指楊冒着借貸的風險入股，對聯想嘅現在和未來都好重要，佢對此真心感謝，且互相感恩。柳傳志又話，好似楊元慶咁嘅CEO，先至係好嘅高級管理層喎，因為佢入股顯示咗佢係用主人嘅心態經營公司，而一般嘅職業經理人都係以短線嘅心態管理業務，好少從公司嘅長遠利益出發。
照呢個講法，唔通咁多間上市公司嘅CEO，都要好似楊元慶咁借錢買股，先至係好嘅CEO？楊入股價係3.95元，但尋日聯想公布咗首季業績後，股價反而急插7.5%，低見4.45元，距離楊元慶嘅入股價只差5毫子。
報料電郵﹕[email protected]
留言 (0)
