伯明翰12厘高息借錢冚債

【明報專訊】伯明翰環球（2309）唔止單輸波降級畀贊助商「勒索」，仲搞到要向副主席「度水」渡日。噚日集團出通告，公司同個位都未坐熱嘅新副主席楊越洲伸手借8000萬港紙。但個公告都幾坦白，話就係用來還數。小琴翻查伯明翰嘅中期報告，不出意外，有一筆逾8000萬港元的抵押透支就喺噚日要還錢。

副主席上任當日即解囊

呢位內地地產商人楊越洲，應該就唔係伯明翰球隊嘅粉絲。因為呢8000萬貸款雖然唔使抵押，但年利率有12厘，一啲都唔含糊。佢喺上個月初都係挾8000萬買入伯明翰嘅可換股債券，如果行使認股權，可以喺公司穩坐第二把交椅。僅次於現時畀洗黑錢官司纏身嘅主席楊家誠。

但相比凈流動負債3.5億，呢7000萬真係杯水車薪。楊越洲啱啱喺8月30號正式上任，就再「慷慨」解囊，一日都唔使，準時過球賽終場吹雞。楊家誠因捲入洗黑錢事件，資產相信已經被政府凍結。加上球隊英超變英冠，無形資產再減值。楊越洲下一步仲會做乜，好值得大家拭目以待。