港富豪增長 落後內地星洲

【明報專訊】港元同美元掛鈎，除咗令港紙貶值之外，仲令香港富豪增長落後其他亞洲國家。噚日瑞士寶盛銀行發表一份亞洲財富報告，覆蓋中國、印度、南韓、新加坡同香港等亞洲地區，發現香港嘅高資產淨值人士，喺未來5年嘅增長，係咁多個地區入面最慢，原因係聯繫匯率令到港元無得升值。

聯繫匯率累事

份報告話，高資產淨值人士指擁有100萬美元以上可投資資產嘅人士，喺香港，呢批富豪未來5年會有8.7％嘅複合增長，去到13.1萬人；而佢哋嘅財富就會增長8％去到7110億美元。咁樣睇，其實香港嘅富豪都好有錢，但係富豪人數增長就唔夠其他亞洲區，好似新加坡富豪人數5年增長率為15.2％，中國就有22.4％增長。

至於原因，瑞士寶盛亞洲首席執行官繆康弘就解釋，因為港元同美元掛鈎，港元無得升值，人數同財富增長，自然冇其他亞洲區咁高，因為好多亞洲貨幣依家都係被低估，嚟緊5年會大大升值。

另外，瑞士寶盛又推出咗生活指數，以20類奢侈品為基準，今年指數增長咗11.7％，代表奢侈生活嘅成本上升，亦都比正常通脹高。所以繆康弘就話，要退休後都享受到奢侈生活，退休前就一定要做好財富管理啦。