美銀夠鐘即狂沽建行

【明報專訊】美銀上月底一過限售期就配售131億股建行（0939）股份，套現約647億元，相對於2005年入股價，真係獲利豐厚，直頭當咗建行係佢嘅私家「提款機」咁話。

「學習管理經驗獲益良多」

不過呢，建行董事長郭樹清就唔係咁認同呢種講法，昨日佢出席大連舉行嘅達沃斯論壇期間，畀人問到做「提款機」嘅感受時就話，理解美銀減持係因為佢自己「等錢使」，仲話當年來港上市，如果唔係得美銀呢啲外資機構肯做戰略投資者，建行IPO定價就唔會去到淨資產1.96倍，亦唔會吸引到其他投資者。郭樹清仲話，建行又可以向美銀學習其戰略管理經驗，獲益良多。睇落佢唔單止唔覺得美銀當建行係提款機，仲當佢係恩人添。

不過咁，美銀前前後後響建行身上賺咗成580億元，就算唔係提款機，建行呢筆「感恩」報酬都算和味。