新聞類別
財經
詳情#
【明報專訊】香港金融業界向以專業自居，不過講到敢想敢做，就真係要向祖國同行取吓經。就以剛剛過去之中秋節為例，有老友同小琴講，為咗同平時素有生意往來之大戶基金聯絡感情，唔少內地券商都專登搞活動招呼下一眾芬佬（基金經理）。除豪華遊艇遊下黃浦江外呢啲例牌菜外，最勁爆係有券商竟然搞咗個內衣花生騷，請埋名模着住性感內衣行貓步。
有親身經歷之內地老友爆料俾小琴聽，話諗到一邊食吓飯摸吓酒杯底，一邊又睇住靚女行T台呢個好橋之券商，就係內地都叫有名之光大證券。不過光證請一眾芬佬時都仲係神神秘秘，只係話聚餐席間，會有時裝表演助吓慶，點不知出到來係咁勁爆。
芬佬受落 大讚有諗頭
老友話，個騷在食飯中途開始，初頭都正正常常，有OL裝同青春裝等出場，跟住主持一公布有內衣騷即惹來全場哄動，靚女模特一行出來後，全場芬佬簡直攝影記者上身，飛奔台前搶佔有利位置係咁閃，唔講仲以為咩明星駕到。除內衣騷外仲有泳衣騷，共通點都係咁少布。老友話，即使唔少平日不茍言笑之同行，個晚都笑逐顏開，佢仲大讚光證話有諗頭，未來落盤都或者會幫襯多點咁話。
相對於光證不惜工本，另一家龍頭券商中金就相對失色少少，中秋節個晚只係搞咗個遊艇會，接載親愛的客戶遊吓上海黃浦江，不過咪睇少呢艘遊艇，極盡豪華之能事，唔講仲以為係遊輪呢。
email: [email protected]
留言 (0)
