新聞類別
財經
詳情#
【明報專訊】乜嘢為之「沽空」？相信大部分散戶都識答，咪係無貨都要借貨、先賣後買囉！但小琴噚日出席瑞年國際（2010）嘅記者會，身為公司主席兼大股東嘅王福才，竟然話佢連沽空係點嘅一回事都未搞清楚喎！
事緣券商大摩上周四（6日）出咗份研究報告，將瑞年的目標價大幅削減73%，由7蚊減至唔到2蚊，搞到瑞年管理層不得不四圍「拆彈」，澄清公司第3季銷售錄得40%增長，優於30%的預期，且第4季手頭已有2億元人民幣訂單，相信明年農曆年銷售都會維持強勢。
大摩削目標價前 沽空率急增
小琴翻查呢份報告出街當日及前一日嘅沽空紀錄，瑞年嘅沽空額竟然佔佢成交量二成及三成，較之前幾個月最多嘅6%大增。噚日亦有記者問起王福才，咁不尋常嘅沽空量，有冇覺得公司股價被人為質低，點知佢就回應「我對股市不太懂，沽空是怎麼一回事情到現在也搞不清。」
王福才強調自己一向專注業務，不熟悉資本市場運作，而大摩出報告前亦都冇同公司溝通。至於點解大摩從經銷商度得到嘅信息同公司咁大差別，佢就話大摩可能係搵大城市嘅分銷商，而瑞年嘅涼茶就主攻細城市細舖頭喎。
email:[email protected]
回應 (0)
