三一梁老闆「馬仔」：當官要捐全副身家

【明報專訊】三一重工近排都算新聞多多，老闆梁穩根更加成個新聞人物咁，先畀《福布斯》選做中國首富，跟住三一香港上市計劃延遲，之後竟然有傳佢會開民企老闆先河棄商從政，仲一做就做到副部長級，不過，噚日梁老闆「馬仔」三一重工副總裁黎中銀一聽到記者問到呢個問題，佢即刻搖晒頭話消息係謠傳，理由好有力，皆因做官要捐晒成副身家喎。

話說噚日三一重工同台灣久大集團旗下盈資國際開咗個酒會，宣傳嚟緊會將公司港口機械設備代理權交畀盈資，黎總就代表公司出席見吓一班生意上嘅合作伙伴，小琴自然唔放過機會，問吓佢梁老闆升官件事真定假啦。

黎總聽完就笑笑口搖搖頭否認，佢話梁老闆可能會有個政府銜頭，用嚟代表中國民營企業，跟國家領導人出去外訪，但係如果話真係要做省長部長呢啲有實際職務嘅官員，「不可能，（當官）要捐掉全部身家」，咁又係，啱啱先做咗中國首富，捐幾百億換個副部長嚟做，有邊個願意？