「中國巴菲特」離婚 老婆要分20億身家

【明報專訊】小琴最近好關心香港一單富豪離婚案，因為涉及分身家嘅金額隨時有成55億。但估唔到內地連呢樣嘢都不甘後人，一個叫趙丙賢，被譽為「中國巴菲特」嘅內地投資界奇才，最近就被老婆向法庭提出離婚訴訟，要求分佢20億身家，堪稱「內地最貴離婚案」。

內地最貴離婚案

據講，趙丙賢夫婦相識於微時，喺1990年上海初設證券交易所，建立股票市場時，憑炒賣股票認購證而賺到第一桶金。之後趙丙賢利用呢桶金成立咗一間公司，專做投資銀行業務，規模亦愈做愈大，仲協助唔少公司完成上市，好似2000年，佢就幫同仁堂科技（1666）喺香港完成分拆上市。憑住呢啲成就，趙丙賢聲名鵲起，被冠以「中國巴菲特」稱號。

老婆曾被打報警

可惜，夫妻可以共患難，唔可以共富貴呢條定律，無可避免喺趙丙賢兩公婆身上發生。據佢老婆講，趙丙賢名利兼得之後，愈嚟愈少返屋企，脾氣亦愈嚟愈差，後來仲動不動就拳腳相交打老婆，去年佢老婆被打報警，事後趙丙賢索性唔返屋企，佢老婆亦心灰意冷，決定提出離婚，同時要求分身家。

據估算，趙丙賢間公司持有多間上市公司股份，市值有20億左右。法庭今年8月已經受理呢單離婚案，但係趙丙賢並冇按時出庭，所以家單案仲處理中。

email:piano@mingpao.com