領匯拍埋青協 搞打機比賽

【明報專訊】唔經唔覺又差不多年尾，創造無限商機嘅聖誕節雖然仲有1個月先到，但唔少商場已經陸續裝身吸客，做開屋邨商場嘅領匯（0823），今年都話要掟1000萬出嚟，除咗為旗下55個商場佈置，仲會搞一個聖誕Mario（馬里奧）打機大賽，領匯市場策劃及推廣主管黃端華話，貪馬里奧夠老少咸宜，父母同子女組隊參賽都得喎！

聘百幾個青年活動大使

領匯啱啱公布份中期業績相當靚仔，半年盈利升咗兩成有多，正所謂「發財立品」，除咗搵孖寶兄弟搞氣氛，領匯仲同香港青年協會合作，透過佢哋請咗120個年齡介乎16至27歲嘅青年做活動大使，負青控制人流、提供客戶服務等，為期1個月有多，有培訓有糧出兼有車馬費。黃端華話希望等班後生仔有多啲工作經驗，將來搵工都容易啲。

早排話要喺屋邨街市搞八達通收費，惹來部分商戶投訴被迫安裝，鬧出咗小風波，領匯今次同青協合作，相信都可以攞番啲分啩。