海通擺烏龍 保薦書張冠李戴

【明報專訊】內地A股早兩日差啲出現一家公司兩度上市嘅大烏龍，話說準備來港上市嘅內地證券公司海通證券，早兩日為一家叫道明光學嘅內地公司發布A股上市保薦書，點知保薦書其中一部分竟然寫錯公司名，「道明光學」變咗「姚記撲克」，而呢間姚記撲克8月份就已經上咗市啦，乜家上市公司可以再上多一次市嘅咩？

點解會出錯？原來姚記撲克當日上市亦都係搵海通證券做保薦人，而今次道明光學保薦書出錯嘅部分，內容就同姚記撲克（附圖紅線示）保薦書隻字不差，所以好有理由相信，海通證券嘅工作人員係將成段嘢，由姚記撲克保薦書度剪貼落嚟，但就好大意咁唔記得改番個公司名，結果擺晒大烏龍。

雖然海通都算及早發現，噚日立即作出更正，但始終呢種低級錯誤會令人覺得佢哋做事真係比較馬虎，就算唔影響聲譽，都會成為行內笑話。