思捷德宣布救亡大計

【明報專訊】曾經係「零售股王」思捷（0330），自從業績唔再掂，除咗股價係咁跌之外，又畀人睇死會剔出藍籌股，所以都要做番啲嘢。噚日思捷就喺德國舉行投資者日，管理層向分析員詳細講解吓救亡計劃。不過，噚日投資者日喺德國時間上午9點，亦即係香港時間下午4點左右開始，但係相關資料就要香港晚上11點先上載到公司網站，令到香港嘅股東冇得第一時間跟進公司嘅計劃。

消息話，噚日一早行政總裁范德施、財務總監周福安，同埋嚟自H&M嘅思捷品牌及新業務創作總監Jan Nord會喺德國出席投資者日，同分析員溝通，之後就會帶分析員參觀德國嘅分店。思捷為咗挽救公司，推出救亡計劃，未來4年用185億元，打造品牌同為店舖翻新，不過就講到明因為要投入資金做改革，未來一年收入都會跌3至5％，經營溢利率會得番1％。今次思捷搵晒分析員去德國總部，就應該會詳細講解呢個救亡計劃。