馮婉眉任銀行公會 首位女主席

【明報專訊】馮婉眉（洋名Anita）喺9月接任匯豐香港區總裁之後，仍然保持低調，未見佢有好多機會企出來同傳媒講嘢。不過由出年1月開始，佢就會有大把機會。因為Anita出年將會做銀行公會主席，按慣例公會每隔個禮拜五嘅例會之後，都會由主席見吓傳媒，到時Anita就有大把機會發揮。

小琴同朋友講開，原來咁多年來，銀行公會都未試過有女主席，今次Anita真係同一班姊妹賓架爭番啖氣。銀行公會嘅網頁就冇見到有歷任主席的紀錄，而以小琴嘅記憶，又真係冇見過女主席喎。

銀行公會主席一職，按規矩由3間發鈔行匯豐、渣打同中銀（2388）輪流派香港區嘅一把手出任。2009年係當時仍係匯豐銀行行政總裁嘅王冬勝出任。家下王冬勝升咗做匯控（0005）亞太區行政總裁，香港區嘅舵手就係Anita，所以出年銀公主席就自然由Anita接棒。