新聞類別
財經
詳情#
【明報專訊】唔少企業搞上市時，都會話上市目的係希望提高公司管治質素，包括增加公司透明度云云。小琴想話，大部分公司上市後嘅企業管治質素有冇提高有待商榷，但某程度上透明度一定有提高，有時仲透明到連公司管理層或者大股東嘅婚姻狀况都會成為公開資料添。
港交所（0388）股權披露網頁尋日顯示，中國動向（3818）創辦人兼大股東陳義紅喺本月21日嘅持股量，由今年7月嘅49.55%降至43.77%，而原本同陳義紅一樣持有49.55%嘅劉培英，亦即係陳嘅老婆，持股量更加跌到得番4.98%。
中國動向：夫婦持股應一同申報
一對夫婦係被視為一致行動人士，持股量應該一樣，而陳義紅同劉培英今次申報咗兩個唔同嘅持股，莫非……
小琴不敢胡亂猜測，即刻打電話去公司問吓，而中國動向發言人就話，根據上市條例，夫婦嘅持股量應該一同申報喎。哦，答案都好呼之欲出了。發言人仲話，公司股權變化唔會影響公司營運噃。
其實陳義紅以前係李寧（2331）嘅執行董事，主力睇北京動向，後來體操王子覺得北京動向冇錢賺，賣晒啲股份畀陳義紅，陳義紅就自立門戶，最終變成家嘅中國動向，睇番間公司主要由陳義紅打理，應該係冇乜影響嘅。
email:piano@mingpao.com
回應 (0)
