百盛集團 緬甸搞百貨

【明報專訊】緬甸經歷多年軍人統治，民主運動領袖昂山素姬啱啱先結束軟禁放番出嚟，局勢都唔係好穩定，不過有商家已經睇中當地嘅經濟潛力，諗住進軍當地市場。百貨店營運商百盛（3368）喺吉隆坡嘅母公司，除咗喺內地、馬來西亞、越南同埋印尼有分店外，仲諗住進軍更多東南亞市場，其中一個目的地就係緬甸。不過緬甸軍人統治都未放鬆，人民究竟有無心情去百貨店血拼呢？

百盛旗下兩間喺香港同新加坡上市嘅子公司，分別負責內地同埋東南亞業務，同任兩公司董事總經理嘅鍾榮俊接受外電訪問時就話，正所謂「有危就有機」，除咗緬甸之外，集團仲有興趣進入泰國同菲律賓市場，出年會喺亞洲開24間分店，2013年上半年仲會喺柬埔寨開第一間分店，全部都係政治局勢唔係好穩定嘅地方，百盛真係藝高人膽大。

盼東南亞收入佔集團一半

鍾榮俊話，喺印度支半島地區有1.6億人，係一個好有潛力嘅地區，家集團三成收入來自馬來西亞、越南同印尼，其餘來自中國大陸，佢仲話，隨着集團向東南亞發展，相信未來東南亞同中國嘅收入佔比可以各佔一半。家集團喺內地有49間分店，馬來西亞有37間，而越南同印尼就各有8間。

鍾榮俊又話，出年內地嘅同店銷售增長可以保持到13％，其他地區嘅就可以有8％至20％。雖然家歐美經濟差，但百盛就話，佢哋喺發展咗嘅市場，仲有好好嘅前景喎。

email:piano@mingpao.com