徐悲鴻代表作 盛惠2.7億

【明報專訊】內地最興炒作，可惜近年股樓表現「吊吊揈」，一班內地大款炒無可炒下，唯有轉炒文化廊。近兩年張大千、傅抱石同齊白石等多個名畫家嘅作品，幾乎次次成交個價都可以買番間豪宅。

前晚喺北京保利秋拍會，國畫大師徐悲鴻嘅代表作《九州無事樂耕耘》，起拍價就有1.5億元，最後以2.32億元人民幣成交。計埋15%佣金後，盛惠2.67億元成交，夠買早排劈價到1.9億港元，山頂豪宅倚巒一間雙號屋有突。

呢幅國家一級文物嘅畫作，創出徐悲鴻作品成交嘅世界紀錄，來頭當然唔細啦。據拍賣行介紹，作品係徐悲鴻抱病嗰陣，專門為咗賀佢個老友郭沫若攞獎畫嘅。

其實中國藝術品近年有價有市，拍賣行話多咗人轉炒古玩字畫，貪升值潛力夠高。好似傅抱石嘅《毛主席詩意冊》，早排2.3億元賣出，上手06年買嗰陣，都只係1600萬元咋，5年升值14倍，科網神話騰訊（700）都無咁勁啦。