企業專吼市差 同銀行講數

【明報專訊】市道差對生意人嚟講唔係好事，不過世事無絕對，德勤中國企業重組服務亞洲領導人黎嘉恩就爆料，話呢幾個月多咗好多企業搞債務重組，各行各業都有，佢哋未必一定係債台高築，有啲係生意轉差，專吼個市跌到咁上下，就以大圍經濟惡化為理由，同銀行等債主講數，睇吓可唔可以爭取到有利條件，果然有「生意頭腦」！

德勤今年8至9月期間，向部分會員、銀行業同客戶做問卷調查，收番超過200份問卷，當中有78%受訪者估計，公司明年盈利會下跌。樓價方面，超過59%受訪者預計本港樓價未來12個月會下跌；當中15％更預計跌幅超過一成。只有百業之首嘅銀行業大家睇高一線，超過一半受訪者預計今年香港銀行業盈利會有增長。

雖然大家認為明年經濟前景頗為黯淡，但近95%受訪者估計，企業清盤宗數唔會超過SARS高峰期的1200宗。「清盤王」黎嘉恩都同意，話今年企業重組宗數上升，主要同內地公司有關，出年升勢仲會持續，但除非再有大型公司倒閉等負面因素，否則情况唔會差過03年SARS或08年金融海嘯時期。