新聞類別
財經
詳情#
【明報專訊】噚日公布嘅中國官方PMI（製造業採購經理人指數）同匯豐PMI都按月大跌，令人慨嘆製造業前景惡劣，但同一日，民生銀行（1988）行長洪崎響北京出席一個論壇時所講嘅說話，如果畀班廠佬聽到，真係唔知會點諗。
事關洪崎咁講，內地銀行業呢幾年利潤好高，反而嗰啲企業資金需求同經營壓力就愈來愈大，經營利潤又咁低，感覺好似有少少為富不仁。洪崎仲話，賺得咁多，有時候自己都唔好意思公布喎。
聽到呢番說話，小琴心有戚戚然，唔太理解洪行長咁樣曬命究竟係攞景定係贈興。你話利潤太高搞到唔好意思公布，咁唔通唔公布就代表唔係為富不仁？又或者如果洪行長真係覺得賺太多會於心有愧，點解又唔考慮下將啲錢捐出去，或者畀企業去渡過難關？總好過把口一邊講過意唔去，雙手就一邊放錢入袋。
「內銀利潤高 感覺為富不仁」
其實內地銀行有暴利，原因就係壟斷經營。雖然洪行長好強調民生銀行係民企唔係國企，仲話好支持國有控股股權應該逐步逐步退出市場，畀更多社會資金進入銀行業內，但小琴聽過唔少內地學者都話，內地銀行壟斷經營嘅根本問題並非「國退民進」，而係成個市場冇完全開放，就算民間有資金都唔係隨便可以進入銀行業，你話咁情况又點會唔造成壟斷暴利？
email:piano@mingpao.com
回應 (0)
