德發改名野馬 股價真係脫韁

【明報專訊】正所謂「唔怕生壞命，至怕改壞名」，唔淨止應用喺人身上，股份亦都適用，好似隻野馬國際（0928），呢兩日股價好似脫韁野馬咁，真係冇改錯名！大家好似對呢匹野馬冇乜印象？因為佢改名冇耐，未改名前叫德發，即係前「泳衣大王」郭榮創辦、08年金融海嘯期間因為無錢還償被清盤人接管嗰間公司！野馬噚日最多升過兩成，收市都升緊10個巴仙，其實佢禮拜四已發緊力，單日狂飈最多45%，兩日累計都升咗四成。雖然話啲二三四線股升起上嚟可以毫無原因，不過小琴都嘗試搵答案，原來佢禮拜三公布中期業績扭虧為盈，「賺」成13億幾！怪唔得之後兩日股價升到砰砰聲。之但係望真啲盤數，原來有筆13億嘅「債務重組之收益」入帳，令到業績扭轉乾坤，但呢啲只係帳面數，並冇錢落袋。

「賺」成13億 只係帳面數

其實德發爆煲後，舊年落入股壇名人莊友堅嘅媽媽黃民權名下，而郭榮當年就曾經將德發約38%股權，抵押畀莊友堅打骰嘅中南證券。莊生貴為股壇名人，未來隻野馬會否繼續脫韁，就要拭目以待嘞。

email:piano@mingpao.com