香港生活費用 平過北京上海

【明報專訊】香港地百物騰貴，個個打工仔都叫苦，不過，最近就有調查指出，香港嘅生活費用水平其實仲低過北京同上海。發展及人力資源分配方案供應商ECA International公布最新生活費用指數調查，話香港喺亞洲區內由第6跌至第9位，畀北京上海趕上。


不過，呢個調查淨係監察的一籃子統計項目嘅物價水平，同埋匯率變化，比較唔同地區嘅生活費用，亞太區域總監關禮廉話，計算物價水平時無計入房屋支出，如果計埋租金，香港就會飈升至亞洲區第2位，原因係香港樓價實在太貴。


關禮廉又話，由該公司所監察嘅一籃子統計項目物價水平計，本港嘅通脹率都有7%，但係較亞洲區內平均約8%低，內地嘅通脹率高達9%，加上匯率方面港元同美元掛鈎，而其他亞洲貨幣就係咁升值，所以比較之下香港嘅生活費用就平啲。佢補充，依家國際企業派員工來港工作嘅業務成本平咗，對香港競爭力有幫助喎。