社福兩名單稱實屬巧合

【明報專訊】陷入混戰嘅特首選委會社福界有9張名單、164個參選人，角逐60個議席。有時，Emily都分唔清邊張名單打邊張，日前有業界人士同Emily講，「關社聯盟」同「怒火七星」呢兩張被指係建制派嘅名單，無獨有偶用同一間印刷商「2D Production & Printing」印刷宣傳品，懷疑佢哋有連繫，甚至講到背後有人統籌喎。
對於呢個質疑，「關社聯盟」成員兼沙田委任區議員余秀珠回應話：「好多名單都用同一間公司，咁我哋咪同好多名單有聯繫？」佢話，臨近選舉，好多印刷商主動接觸佢哋，負責嘅成員見報價ok就去馬。佢話，自己嘅嘢都未搞好，邊有時間理其他人。
「怒火七星」成員陳萬聯應都相信係巧合，佢話所有宣傳品都係團隊一手一腳做。佢認識得珠姐，但就話佢同所有社福界參選人都係伙伴，會互相扶持咁話。