港交所畀小賭王免費敲鑼

【明報專訊】近排幾乎日日有新股上市，搞到小琴朝朝要早起蒲頭，好在有鑼聲醒醒神。話說噚日去新濠博亞（6883）個上市儀式，見到大大個銅鑼搬咗出嚟。奇怪喇，港交所呢個3.8萬「敲銅鑼」開市套餐，唔係下年先有咩？
原來係新濠博亞同港交所傾過，要加入呢個環節，「小賭王」何猷龍成為港交所「響鑼第一人」。在場一班「賓架」、「芬佬」齊齊倒數歡呼下，喺開市一刻，何猷龍一棍敲落去，「噹」一聲清脆得嚟又夠氣勢。不過，企正隔籬嘅夏佳理睇嚟就唔多好受喇，要向身邊嘅人「訴苦」話好大聲，耳膜都震一震。
小琴仲八到，港交所旨在試試個效果，所以唔使收錢。其實個儀式幾特別㗎，打嘅過癮，睇嘅又開心，點都好過吓吓舉杯祝酒咁悶啦。
梁高胡文新 齊齊撐場
今次上市儀式，除咗有夏佳理做嘉賓之外，仲有不少稀客。好似恒生（0011）嘅梁高美懿，代表公益金接受捐款，而同何猷龍老友鬼鬼，合和（0054）嘅胡文新都嚟撐場。
講番隻新濠博亞啦，首日掛牌比美國前日升2.4%，收報26元。何猷龍話喺咁嘅市况之下，股價表現算幾好。雖然近排澳門賭業增長慢落嚟，但佢話家澳門賭業嘅規模，已經係美國拉斯維加斯5、6倍。加埋下年橫琴旅遊區開放後，遊客會多好多，自然令賭業更興旺咁話。
email:piano@mingpao.com