劉燕卿下年退休

【明報專訊】服務消委會足足37年嘅總幹事劉燕卿（Connie）明年3月夠鐘退休，但因為要搞埋《競爭法》、商品說明條例修訂等手尾，3月後要做多半年，順便可以有更多時間搵繼任人，然後功成身退。
1973年中大畢業嘅Connie，74年加入消委會由低做起，慢慢升到副總幹事。前總幹事陳黃穗2007年退休，佢就接手坐正做「阿一」。
做足37年 由低做起
Connie合約為期兩年半，明年3月合約完後，會多留半年，10月開始退休前休假。Connie唔想講自己幾多歲，但就話係時候退下來，「今年壓力好大，屋企人又有唔舒服，要多啲時間照顧，係時候退，如果唔係做到死咗仲弊」。
聽聞政府家陣請人好緊，唔會超過60歲，有消息話Connie已夠鐘，好難再續約，唯有盡快請人。消委會已委任跨國獵頭公司全球招聘總幹事，聽日會登招聘廣告。
消委會主席張炳良大讚Connie領導卓越，成就斐然，噚日出新聞稿向佢致敬。Connie話好唔捨得大家，希望繼任人要有危機處理能力，當然仲會提佢記住要覆記者電話啦。