會計界選委 又巡遊又民調鬥法

【明報專訊】再過兩日就係選委會界別分組選舉，會計界有24,630名選民，參選人都好落力拉票，噚日，由四大會計師行支持嘅「A16」團隊，同龔耀輝等組成嘅「由你揀」團隊，分別舉行造勢會，前者仲出動開篷巴士巡遊，頗有聲勢。
話業界最關注經濟
「A16」做咗個業界民調，收集咗1323份問卷，反映業界最關注係經濟，其次係民生，最迫切要解決嘅係房屋同土地政策。至於政治議題，最優先係保障言論同新聞自由，其次係改良問責制，以及決定立法會功能組別存廢問題。
會計界「Y5正能量」團隊都做咗一個民調，收集254份業界投票，53％支持梁振英，41％支持唐英年。「由你揀」團隊則喺造勢會拆咗個營幕，以示自己非唐梁陣營，話會全憑業界選民意願，決定支持邊個候選人咁講。
另外，法律界選委參選團隊「vox pop」都做民調，邀請選民上網填寫問卷，收到208個回覆，梁振英支持度有39.4％，高過16.3％嘅唐英年，葉劉淑儀同何俊仁分別係10.1％同5.8％。佢哋話，仍會繼續做民調，視乎政綱再決定支持邊一位。