羅兵咸服務不周 中行一董事反對續聘

【明報專訊】經濟前景不明朗，各行各業都要提升服務質素，先至留得住客戶，就算行業龍頭亦都不例外。話說中國銀行（3988）噚日進行嘅董事會會議，就有一名董事不滿會計師行PWC（即係羅兵咸永道，內地稱普華永道中天）嘅表現，反對繼續聘用佢為核數師喎，理由係「服務不好，質量較差」。


好在中行共有15名董事，即使一人反對，剩返仲有14人支持，PWC仍然繼續獲聘。但所謂「客戶永遠都係對的」，雖然得一個董事不滿，但出現咁嘅情况，相信PWC都應該檢討下，有咩地方服侍得唔周到，話晒舊年都收咗人成1.72億人民幣嘅核數費。可惜董事會公告冇披露邊位董事投咗反對票，但無論如何，事件起碼都應該提醒所有國際金融服務機構，維護客戶關係最緊要都係要做好基本服務。